10,645
Фото: uzbekistan.travel
Бахмал тоғларида жойлашган сўлим Новқа қишлоғида икки кун меҳмон бўлдик.
Ҳақиқатда у ерларни бекорга Бахмал дейишмас экан. Бахмалга кирар эканмиз, лолақизғалдоқ ва турли гуллар билан табиат томонидан безатилган Аллоҳнинг буюк қудратига гувоҳ бўлдик. Худди табиат ўз гўзалликларини гилам қилиб тўшаб қўйгандек.
Ҳавога эса таърифлаш учун сўз етмайди. Шаҳарнинг бўғиқ ва сиқиқ ҳавосидан безор бўлган танамиз тоза ҳаво нималигини ҳис эта бошлади.
Биз тушган қишлоқ тоғ ёнбағрида, дарахтлар жуда ҳам кўп бир масканда экан.
Қушлар, айниқса, булбулларнинг сайрашларини эшитиб жуда маза қилади, одам. Қишлоқда тонг отиши жудаям гўзал бўларкан. Бомдод намозидан кейин ташқарига чиқиб табиатни кузатиб ором оласиз. Тоза ҳаво (бироз совуқроқ), қушларнинг сайрашлари, товуқларнинг қичқиришлари, Майин шабада, қимирлаб салом бераётган дарахтлар…
Тоғ одамлари эса жудаям самимий, меҳмондўст эканлар. “Э, келинг меҳмон, димоғинғиз чағма, дамнигана журибсизма?” дея ширин шеваларида ҳол сўрашлари манга жуда ёқди.
Новқа қишлоғидагиларнинг муқаддас жойларидан бири Бешпанжа булоғи экан. Ҳали бунақа катта булоқни кўрмаган эдим. Худди 5 панжадан чиқаётгандек, булоқ суви қайнаб тошлар орасидан сизиб чиқаяпти. Ана мўъжизаю мана мўъжиза. Булоқдаги балиқлар ҳам инсонни ҳайратга солади. Новқага келиб қолган одам, ўзини жаннатнинг бир боғчаларида деб тасаввур қилади, қалин дарахтзор бўйлаб юраверсангиз тоққа чиқиб кетасиз.
Аввалига мезбон, бизни тоққа чиқа олмасангиз керак, чарчаб қоласизлар, деб бизга ишонишмади. Эртаси куни ҳуржунларни кўтарганча тоққа равона бўлдик. Пастдан кўринишда унчалик баланд бўлмаган тоққа кўтарилишимиз билан юксаликни ҳис қила бошладик. Ҳақиқатда тоғ жуда баланд экан. Айниқса тиккалиги бизни бироз қийнади. Эмгалаб бўлсада мақсадга эришишга ҳаракат қилдик.
Йўлбошловчимиз бизни тоғ чўққисида лолазорни кўрсатишга ваъда берган эдик. Кўтариляпмиз, кўтариляпмиз. Китобларда ўқиганим лолазорларни кўриш истаги манга қўшимча куч бағишларди. Кичик-кичик чўққилардан 3-4 тасини ҳам ошиб бўлдик, лекин қани лолазор? Йўқ, лолаларни биздан олдингиз зиёратчилар юлиб кетишган. Начора ҳамма умид энг катта чўққидан. Ҳатто новқалик дўстимиз Азизбек ҳам ушбу кўтарилишда умрида биринчи марта бундай юксакликка чиқаётганди. Юксакликдан қишлоқ энди картадагидек кичкина бўлиб кўринарди. Биз яна кўтарилаяпмиз. Лекин ҳали вери лолазордан дарак йўқ.
Фото: Давронбек Тожалиев
Бизни бургут ва қирғийлар назорат қилиб боришмоқда. Узоқдан бўрининг увиллаши ҳам эшитилади. Ана чўққига озгина қолди. Тоғ жуда тикка, озгина нотўгри ҳаракат ҳам фожеага олиб бориши мумкин. Аллоҳдан ёрдам сўраб яна кўтарилдик…
Чўққига ҳам етдик… Тоғ чўққисида лолазор! Табиатнинг гўзаллигини қаранг! Биз мақсадга эришдик. Лолалардан тераяпману, қанийдо аяжоним шу ерда бўпқолсалар дейман, лолаларни оламану, бир қучоқ қилиб уларга совға қиламан. Қанчалик хурсанд бўлишларини тасаввур қилолсангиз эди… Чўққида туриб уйга телефон қиламан…
Чиқишга чиқиб олдикку, энди тушиш жуда қийин экан, сарбонимиз Бўривойдан фарқли ўлароқунинг акаси Обиджон бизни тикка йўлдан олиб тушса бўладими, зўрға тушиб олдик. Энди биз бошқа қишлоқда эдик. Тоғдан қишлоққача ҳам анча масофа экан. Бўривойнинг “Ҳейла, қишлоқ кўринди” дегани ҳам нақд 5 км экан. Пиёда бордик. Ўтлоқларда кезиб, табиатнинг гўзалликларини томаша қилиб, Моғол қишлоғига кириб қолганимизни ҳам билмай қолибмиз. Моғолдан Новқагача 8 km.lar бор. Шунча пиёда юрган уёғига ҳам пиёда кетишни таклиф қилдим. Айни муддао бўлди. Йўл бўйидаги далалар оралаб Новқага ҳам кириб олдик.
Эртаси куни эрталаб эса, яна сўлим Бахмални тарк этиб, тутун тўла шаҳарга йўл олдик…
20.05.2006
0